Sámiid Riikkabeaivi
Ii gávdno oktage eiseváldi Ruoŧas mii sulastahttá Sámedikki. Sámediggi lea sámiid riikkabeaivi muhto dan sáhttá maiddái buohtastit gielddalaš organisašuvnnain. Dattege ii leat Sámedikkis vearrogáibidanriekti ja dat ii sáhte ásahit lágaid.
Politihkalaš stivrejupmi
Sámedikki politihkalaš stivrejupmi doaimmaha Sámedikki dievasčoahkkin ("sámiid riikkabeaivi") ja Sámedikki stivra ("ráđđehus"). Sámedikki dievasčoahkkimis lea čoahkkinjođihangoddi mii ráhkkanahttá ja ovddasvástida dievasčoahkkima čoahkkimiid.
Hálddahus
Hálddahusas lea beaivválaš ovddasvástádus doaimmahit eiseváldedoaimmaid. Sámediggi stáhtalaš eiseváldin gullá Kulturdepartemeantta vuollái. Váldohálddahus lea Gironis ja báikkálaš čállingottit gávdnojit Johkamohkis, Deartnás ja Staares.
Bargodoaimmat
Sámedikki vuođđodoaibma lea bargat ealli sámi kultuvrra ovddas. Sámi kultuvrii gullet maiddái sámi ealáhusdoaimmat. Muđui leat doaimmat reglerejuvvon sámediggelágas (SFS 1992:1433).