Bálkkašeaddji guovttos leaba bargan sihke dáiddalaččat ja čáppagirjjálaččat, muhto maiddái akademalaččat- ja gielladieđalaččat.
Pekka Sammallahti
Pekka Sammallahtti oažžu Davviriikkaid sámi giellabálkkašumi Gollegiella, guhkilmas ja dehálaš barggu ovddas sámegielain ja ofelažžan ja sámi servodaga ovttasbargoguoibmin. Dan rájes go mánnán oahpai moadde sámegiela sáni ja dál son máhttá máŋga sámegiela ja lea háhkan nana giellamáhtu, maid son iešguđege láhkái juogada earáiguin ja iešguđege vuogádagain. sápmelažžii. Son lea sámegiela čáppagirjjálašvuođa buktagiid jorgalan vái eanet besset lohkat daid, bagadallan ollu girječálliid, buvttadan sátnegirjjiid ja leamaš mielde biibbaljorgaleami barggus Sammallahti vástida báikenamma-, terminologiija-, suopmanerohus- ja grammatihka gažaldagaid nugo ovdamearkka dihtii Facebooka Ártegis ságat joavkkus. Giellabálvalus leamaš veahkki máŋga buolvva. Sammallahtti lea professor emeritus Oulu universitehta Giellagas-instituhtas Suomas. Son lea nannen sámegiela fágasuorggi, sihke Sámi Allaskuvllas Guovdageainnus ja Uit Norgga Árktalaš Universitehtas Romssas.
Pia Persson
Sig-Britt ”Pia” Persson oažžu Davviriikka sámi giellabálkkašumi Gollegiella áŋgiris ja movttiidahtti barggu ovddas oarjelsámegielain, mainna lea olles eallima bargan. Sus lea nana dovdu giela šukŋii ja poesiijai. Go lea jorgalan dramatihkaja bagadallan neavttáriid ja artisttaid, de lea dagahan ahte oarjelsámegiella lea ožžon ođđa arenaid, ođđa jienaid ja gehččiid. Son lea bargan oarjelsámegiela sáddagiin NRK-Sámis ja journalista barggustis lea son nannen oarjesámegiela mediafálaldaga ja sámi servodatdigaštallama. Su buvttadeamit leat duođaštan sámegiela, giellageavaheami ja terminologiija ja suopmanrájáid. Dasa lassin lea Persson máŋga jagi sámegiela oahpahan, oahppomateriálaid ráhkadan ja giellamovttiidanprošeavttain bargan Sámedikki giellabargin Norggas.