renar som äter pellets

Roassovahátdoarjja

Dálvi lea garra áigi bohccuide. Muhtimin dáhpáhuvvá nu ahte bilida dahje lásse guohtuma. Dávjá leat iežá eatnamat, maid sáhttá guođohit ja hárve lea olles boazoguohtunguovllus heajos guohtun oktanis.

Earenomáš heajos guohtumin

Boazodoallomearrádusa (1993:384) § 35 a mielde sáhttá jus lea ruhta, addit doarjaga čerrui gokčandihte oasi biebmangoluin, mat bohtet eastadandihte boazojámu go lea earenomáš heajos guohtun.

Earenomáš heajos guohtumiin oaivvilduvvo ahte lea guohtuma bilidan dahje lássen. Sámedikkis lea láhkaásahus (STFS 2019:1), mii stivre makkár dilálašvuođain doarjaga sáhttá addit.

"Earenomáš heajos guohtun" lea:

  • eanaš oassi ealus dárbbaša vahátbuhtadusa/eanaš oassi ealus lea sorjevaš vahátbuhtasas
  • skilžon guohtoneatnamat, láhput eai leat olámuttos, muorain ritni ja muohta 
  • eanet go 75 cm muohta 

Geahča njuolggadusaid dokumeanttas, mii lea mielddusin. 

Oza maŋemustá guovvamánu 15. beaivvi

Doarjja gokčá eanemusat 50 % čearu duođaštuvvon jeagel-, fuođđar- dahje suoidnegoluin. Sáhttá maiddái oažžut doarjaga fievrridan- ja luoitingoluide, jus vissis eavttut devdojuvvojit (gč. láhkaásahusa). Biebmangolut mat čearus dábálaččat leat eai buhtaduvvo.

Ohcamuš galgá dahkkojuvvot sierra skoviin, maŋemustá guovvamánu 15. beaivvi. Guovtti vahku siste galgá Sámediggi iskat guohtuma. Dan maŋŋel mearrida Sámediggi doarjaga juolludeamis.

Doarjja máksojuvvo čearu biebmangoluid ovddas dan beaivvi rájis go guohtuniskanohcamuš lea boahtán Sámediggái gitta guhkimusat njukčamánu 31 b. dan dálvvi. Buhtadus ii máksojuvvo biebmama dahje fievrrideami ovddas, mii lea dáhpáhuvvan ovdal ohcanbeaivvi ja maŋŋel njukčamánu 31. b. Biebman galgá álgán maŋemusat vahku maŋŋel dan beaivi go buhtadusohcamuš lea boahtán Sámediggái.

Guohtuma iskan

Go ohcamuš lea boahtán sisa, de Sámediggi gulahallá čearuin guohtuniskama áiggi birra. Sámedikki bargit isket guohtuma, ovttas čearu gulahallanolbmuin ja unnimusat guvttiin Sámedikki nammaduvvon guohtuniskanjoavkkus. Čohkkejuvvon árvvoštallan guohtuniskamis doaibma ovttas čearu ohcamušain mearrádusvuođđun.

Ruđaid rekvisišuvdna

Go rekvirere ruđaid galgá geavahit sierra skovi (geahča olgešravddas). Rekvisišuvdnii galget kopiijat rehkegiin ja čađahuvvon máksimiin biddjojuvvot mielde.

Senast uppdaterad: 3 april 2025 av Marie Enoksson.